教會聖誕福音劇
雲裏快樂報佳音
——獻給話劇《春分之後》原作者蘇恩佩
（改編自《普世歡騰》）
第一幕
場景：十二月二十四日九時許香港某繁忙街道一角
登場人物：堅叔、王姑娘、家輝、思思、青年（A、B、C、D）
（幕閉；台中擺放露宿者的帆布床及其他物件，亮台上射燈）
旁：親愛的弟兄阿，我們應當彼此相愛．因為愛是從神來的。凡有愛心的，都是由神而生，並且認識神。沒有愛心的，就不認識神，因為神就是愛。
（幕開；噪音[包含《雲裏快樂報佳音》歌，錄音廣播]；亮五彩燈）
青年A：喂喂……飯又食完啦，我地今晚去邊度玩呀？
青年B：不如卡拉OK直落啦！
青年C：嘿！你好似係基督徒黎個喎，今晚教會冇搞PARTY咩？
青年B：好悶架！同你地出黎玩仲好啦！
青年D：咁即係去邊好唧？難得聖誕有假放，唔駛番學，一於去狂歡一下咯！
青年B：唏！落BAR啦！飲番兩杯夠熱鬧嘛~~~嘩！作死呀亞婆！行路唔帶眼撞親我啦！
青年A：咪理佢啦。咦？喂！你睇！嗰個女仔條金鏈好靚噃，殘眼到丫！
青年C：睇過！超！我嗰條咪仲靚！貴野黎架！成千銀一條夠哂鎊架！
青年D：成千蚊？係咪流架？
青年C：你就流！我HONEY買俾我架，邊有假！
青年B：哈哈哈……知道你HONEY有錢啦！喺度哂野！
青年B：哎呀！今次到我踩親人添！
堅：死靚仔！行路唔帶眼！想死牙？
青年B：喂！而家咩事呀！輕輕踩你一下駛死牙？睇你寒寒酸酸，身又臭過人，都唔方好人啦！
青年A：咪係！咦？超！原來係訓街既！阿伯！有街你就訓啦！喺度勞嘈！
堅：你地依班靚仔，淨係識得玩，有書又讀唔好，都唔方有出色啦！全部都唔係好野！以後咪又係好似我咁訓街！
青年D：嘩！阿伯！而家有咩得罪你呀？咁咒我地？
青年C：你咁鬼惡！我話你緊係屋企人都頂你唔順，唔要你啦！趕你出黎訓街！
堅：（怒）你講咩呀？
眾青年：咩呀！咩唔好呀！
堅：可惡……你地班靚仔！一定係唔打唔曉大！好！等我俾啲厲害你地睇！
眾青年：嘩嘩……你邊度搵技棍出黎架（C）……訓街佬想打死人呀（A）……走啦走啦……
（廣播完畢，堅叔拿著木棍邊走出後台邊大罵，關五彩燈）
堅：（喘氣）嘿……嘿……可惡！下次遇到你地……一定唔放過你地……全部都唔係好野黎架！（坐在床上）
（王姑娘拿著一個大袋從後台步出，袋裏載著棉被和餅乾）
王：堅叔，聖誕快樂。我又黎探你啦。
堅：乜又係王姑娘你牙？你地啲自命清高既基督徒好煩呀！要煩就搵第二個，唔好煩我！
王：堅叔仲乜咁勞氣呀？邊個激親你呀？
（堅叔一臉繃緊，對王姑娘的問候不予理睬）
王：（微笑，同坐）堅叔你食左飯未呀？（堅不理睬，停頓一會）而家冬天，要著多件衫唔好冷親啊，（堅不理睬，停頓一會）頭先我去左探隔離街個湯婆婆同沈伯，佢地話你成日都發脾氣，同人嗌交。不如咁丫，如果你聽日冇野做既話，不如同我返露宿者之家丫，有聖誕聚餐，沈伯佢地都去架！仲有好多人可以同你傾計添。
堅：（不耐煩）王姑娘！你咪煩我啦！你知唔知你煩左我幾耐呀？三年啦！你同班義工每星期不停黎煩我，講耶穌！你厭唔厭架！我唔會信架！你地依啲基督徒，都唔係好野黎既，頭先果班死靚仔，咪有一個基督徒囉，踩親人惡人先告狀，咁算基督徒咩？
王：堅叔，我記得有次有人話啲露宿者不務正業、唔肯搵野做先至會訓街咁折墮，你反駁話雖然真係有啲咁既人，但係唔可以一竹竿打一船人，蝦！聽你頭先對基督教既形容，你唔係自打嘴巴咩？
堅：下……
王：堅叔，我希望可以幫到你消除對基督教同基督徒既偏見，不過今日你心情唔好，我遲啲先同你再傾，好唔好？
堅：嗯。隨便你啦。
王：其實都好多人關心你架，拿，阿沈伯之前同我講你張被俾人偷左喎，我帶左一張新綿被俾你呀，等你夜晚訓覺唔好凍親。（取綿被）你睇！都幾靚架。我仲帶左啲野食俾你。
堅：你地真係多事。（接過綿被，有少許感動的樣子）
王：咁你好好保重喎，下星期我再黎探你，bye bye。
（王姑娘退入後台）
堅：（自言自語）乜……真係好多人都關心我既咩？
（思思後台呼喊堅）
堅：（笑）呵呵……思思！你走慢啲走慢啲，小心跌親啊。（思出場、揮手、奔跑）咁凍你都黎探我？緊係你老豆又帶你去行街啦！
思：係啊！爸爸帶我出黎買聖誕禮物！
（家輝帶著購物袋從後台步出）
輝：呵呵呵……大佬堅！（打招呼）天寒地凍，駛唔駛同你去茶餐廳飲杯熱茶呀？思思坐帆布床，搞東搞西）
堅：哼！輝少，你都識得話天寒地凍，仲帶思思出黎做乜？你又話有cancer就黎歸天就算啦，唔怕凍病思思咩？
輝：我驚你成日起條街度會悶死，咪帶思思出黎探你囉，識左你幾廿年，你講野仲係咁唔俾面！
（思思從購物袋中取出bear公仔）
思：（從床上「彈起」）堅叔叔！你睇下頭先爸爸買俾我既公仔得唔得意？
堅：得意！不過思思仲得意！
思：（笑）嘻嘻……
堅：係呢，思思肚唔肚俄呀？頭先嗰個好好人既王姑娘黎過，仲俾左啲野食我，思思乖，坐低食丫！
思：哦！
輝：（密斟樣子）大佬堅，過黎丫，有啲野想同你傾……照我話，你都好應該番去啦，佢地果時都係火遮眼唧，都咁多年咯，冇野既。
堅：（激動）唔好同我講佢地，佢地趕得我出黎我就唔會番去。（坐梯級）唔好講我啦！講多都哂氣。（關注）係啦你自己呢！自從上年思思小兒麻痺果隻腳好番，可以行得番之後，你就成日帶佢周圍走，你自己都要保重啦，有cancer唔駛入廠咩？
輝：（坐在堅旁）我下星期入啦，要進行第二程療程，所以今日咪帶佢黎睇你囉。哈哈哈……可能我入左廠之後，到番轉頭要你帶思思黎睇我啦！哈哈……
堅：俾你激死！都唔係好野黎既！都唔知點解你咁輕鬆，咁放得低。
輝：其實我初初都好絕望沮喪架……但係後來就唔同啦，我知道我既盼望喺邊度……大佬輝……話俾你知，我已經信左耶穌啦！
堅：（站起）下？你轉死性牙？你竟然信左鬼佬教？唔通你唔記得國仇家恨咩？
輝：你唔好同我咬啦！信耶穌好呀！不如咁，你同我返教會啦！有好多人可以幫到你架！
堅：你唔駛講！道不同不相為謀，我係唔會信依個睇又睇唔倒、摸又摸唔倒既神既！
輝：唉……
思：堅叔叔，我啱啱學左新歌，你要唔要聽？
堅：好，好，堅叔叔最鐘意聽思思唱歌，你快啲唱黎聽聽！
思：哈哈哈，好呀！
（堅坐在帆布床）
歌詞：雲裏快樂報佳音，天軍歌聲歡欣。同讚美達至高天，天家福蔭賜萬民。歌聲歡騰快樂頌揚，空中星辰照萬萬人。天軍天使奏樂韻，傳頌救主為我降生。天軍天使奏樂韻，榮耀救主讚美不禁……
（思思唱歌同時，堅叔獨白）
獨：思思唱既……竟然係依個隻日播夜播又糟又煩既歌……但係，點解會好聽咁多既？……輝少自身難保又咁好黎探我……點解……會咁暖既？就好似王姑娘送俾我既綿被一樣咁暖（站起）……究竟……點解輝少會信依個神既呢？……我……我係唔會信既……除非……除非俾我見到真正既神……我先至會……
（堅叔獨白同時，家輝與思思與堅叔作別慢慢退回後台，堅叔表情失神，緊抱綿被，慢慢步向前方，口中喃喃自語；亮台下射燈，播放車輛急駛而來聲效，堅叔慘叫飛起跌在台中昏迷；關所有射燈；幕閉）
