第二幕
場景：伯利恆外曠野，馬槽，耶穌剛誕生
登場人物：堅叔、假天使、約瑟、馬利亞
（堅叔昏迷在台上）
旁：一切的靈，你們不可都信，總要試驗那些靈是出於神的不是。凡靈不認耶穌，就不是出於神，這是那敵基督者的靈。
（廣播《神愛世人》音樂；亮五彩燈；幕開；堅叔清醒；關五彩燈）
堅：（東張西望，害怕）咦？依度……依度係邊度黎架？我……頭先唔係俾車撞親咩？咦？冇事既？但係……我究竟去左邊呀？（音樂停）咁……咁黑既……（欲向前走，跌倒）哎呀！點解有咁多石頭同雜草既？我究竟去左邊呀？（大叫）有冇人呀？有冇人呀？
（亮台上射燈）
天：（後台廣播）（溫柔）堅叔……堅叔……
堅：邊個！？……係邊個呀！？
（假天使步出後台）
天：（溫柔）你唔駛驚，我係天使加百列，奉神既命令黎引渡你。當你被車撞倒既一剎那，穿過時空之門，黎到二千年前既伯利恆……
堅：二千年前既伯利恆？
天：冇錯，你頭先咪講過想要親眼見到耶穌既？今晚就係耶穌出世既一晚啦。
堅：（驚訝）乜……乜真係有耶穌架？真係有神架？咦？乜你個樣咁似王姑娘既？
天：我借用左王姑娘個樣，等你喺依個陌生既環境見到我都唔駛驚。我知道你其實心底裏面好尊敬王姑娘，敬佩佢咁好人，係咪？
堅：……（低頭無言）
天：我又知道，你其實並唔係真係咁憎基督教，你對神都有一種好奇同渴慕，但係你份人好硬頸，唔肯承認自己既軟弱同需要——
堅：（掩耳）唔好再講啦！
天：其實你覺得好孤獨，但又知道自己唔應該對老婆同啲仔女咁惡，成日打佢地，你好想搵番佢地，但係你覺得做露宿者訓街係對自己既一種贖罪——
堅：唔好講啦……唔好講啦……
天：而家有一條路俾你去選擇，就係認罪、悔改、信神。之後神就會俾力量你去面對一切，只要神真係存在，你乜都唔駛驚……
堅：（茫然，然後渴望）真既？我真係可以重新黎過？天……天使大人……我想相信，但係你係咪真係會帶我見耶穌？我想見佢！我要見到佢先至會信！
（播放《基督主降生》音樂一段）
天：好……好……我頭先都講過，我今次黎既目的就係帶你去見耶穌，今晚係耶穌出世既一晚，約瑟同瑪利亞已經喺馬槽嗰度。你跟我黎啦。
（假天使與堅叔退入後台；幕閉；換馬槽場景，馬利亞手抱嬰兒布倚傍約瑟坐著；音樂停，後台廣播）
天：你睇，我地過埋依個小山頭就到啦。
堅：（大喜）真既？耶穌真係喺嗰度？咁我地快啲行咯！（腳步聲由大漸小）
天：（冷笑à明顯奸笑）嘿嘿……
（亮台上射燈；幕開；堅叔快步走出後台）
堅：（大喜）我搵到啦！我搵到啦！你地……你地就係約瑟同馬利亞牙？
約：冇錯，我就係約瑟，佢係我太太馬利亞，你係？
堅：我？……我係由好遠地方黎既……真係估唔到可以見到你地。我……我……
約：頭先幾位牧羊人同東方黎既博士啱啱走左，你係咪同佢地一樣，都想黎見耶穌？
堅：係……係呀……依個……依個就係世人所講既救世主耶穌？
馬：天使曾經稱我為有福，佢同我講，你要懷孕生子，可以將佢起名為耶穌。佢被稱為至高者既兒子，佢要作以色列既王，直到永遠。
約：天使亦都向我啟示，馬利亞所生既將來會將人從罪惡裏面拯救出黎。雖然依件事好似好荒唐，但係我地兩夫婦都同樣確信，因為，依個係一個事實。
堅：（自言自語）真……真係？耶穌真係存在？咁樣……一切都唔係假，係真既？（向約瑟夫婦）我……我可唔可以睇下耶穌。
（約瑟夫婦對望，點頭）
馬：你過黎啦。
（堅叔走前想探看嬰兒布）
堅：（大驚）咦？點解咁既？（後退）點……點解會咁既？
（堅衝前搶布，一把翻開，布裏空空如也）
堅：（大叫）點解乜都冇既？（自言自語）（約瑟夫婦退回後台）唔通……唔通一切都係假既？一切都係假既？你地喺度呃我！（站起，亮射燈）呃我！天使！加百列！你出黎！你答我！
天：（後台廣播）（奸笑）嘿嘿嘿嘿嘿！你正一係大蠢材！依個只不過係一個夢！
堅：你講咩話？你玩我？
天：嘿嘿嘿！世界上根本冇神！而且，我根本唔係天使！我係魔鬼！（進場）
堅：下？你……你……
天：依個世界冇神！冇天使！冇好野！學你話齋，全部都係唔好野。如果有神，點解世界咁多不幸？如果有神，點解快樂唔會持久？如果有神，點解基督徒唔係全部好人？（步步進逼堅叔至幕前梯級）
堅：但係王姑娘佢……佢咁好人，咁幫我……連阿輝佢都信左耶穌……應該係真掛？
天：我特登造呢個夢出黎，就係要點醒你。神咁虛無飄渺既野點可以信架，你唔好咁傻啦！
堅：唔通一切都係假既？（沉思）我依一生人，好失敗。我唔信自己，其他人都唔信，因為我知道個個都唔係好野！但係，真係冇野值得我相信咩？神？荒謬！邊度有神架？但係……聽落都唔錯，神喎，應該信得過……但係……究竟有冇神既呢？有冇呢？
天：（焦急）你唔好再亂咁諗野啦！諗咁多壞腦架！我都講過冇神咯！冇架！冇架——
（亮台前射燈，播放神的聲音錄音，假天使作懼怕貌）
神：（威嚴）撒但，退我後邊去吧！你是絆我腳的。
（假天使慘叫遁走退場）
堅：（茫然）你……你係邊個？魔鬼呢？（醒悟）魔鬼唔係好野黎，佢專講大話，唔信得，唔信得……（抑首）咁你呢？……唔通……你至係真正既……神？
（堅叔不斷在台前奔走尋覓呼喚，播放《神愛世人》歌）
歌詞：神愛世間的一切罪人，讓愛子謙卑降生凡塵為了救恩生於伯利恆，成就世上大憐憫一生奔波，卻被人埋怨，甘心為世間罪人犧牲一切為人，在十架上代償罪困……
堅：（呼叫）神啊，你去左邊度？你喺邊度？我有好多野要問你，我想再聽你既聲音，你話俾我知，我究竟應該點樣做？我點樣先至搵到你？神啊！神啊！你唔現身既話，我點知答案係乜？我點樣可以信你？
神：（慈愛）你們祈求，就給你們；尋找，就尋見。因為凡祈求的，就得著；尋找的，就尋見。那沒有看見就信的，有福了。
堅：神啊！你究竟喺邊度？我點樣先可以見到你？
（奔走離場退回後台）
神：你不要懼怕，不要驚惶，無論你往哪裏去，我必與你同在，必不撇下你，也不丟棄你。
（幕閉；錄音停）
