第三幕

場景：十二月二十四日十一時許醫院病房

登場人物：堅叔、王姑娘、家輝、思思、堅叔家人（妻、子、女）

旁：神差他獨生子到世間來，使我們藉著他得生，神愛我們的心，在此就顯明了。親愛的弟兄阿，神既是這樣愛我們，我們也當彼此相愛。從來沒有人見過神，我們若彼此相愛，神就住在我們裏面，愛他的心在我們裏面得以完全了。

（幕開，播放錄音：救護車輛聲音和響號；錄音停；堅叔躺在台中擺放的病床，頭扎繃帶，旁邊有一矮櫃，櫃上有花瓶和鐘；家輝、思思、王姑娘依序站在床後呼喚堅叔）

 堅：（夢囈）嗯……神啊我究竟點樣先見到你呀？（亮台上射燈）（堅夢醒，喘氣）乜……係發夢黎架？

思：堅叔佢醒番啦，好野好野！

堅：（望見眾人）咦？輝少？思思？……王姑娘？

輝：大佬堅，頭先嚇死我地啦，我同思思一走，就聽到撞車聲，即刻走番黎就見到你訓喺地咯。（堅欲坐起，輝邊說邊相扶）乜你咁唔小心呀？

堅：我……我個頭有啲暈……

王：堅叔，醫生話你只係有少少腦震蕩同擦傷，好快冇事，好彩你攬住我俾你張綿被，擋左唔少力。係啦，你頭先發開口夢話想見神喎，究竟咩事呀？

堅：……頭先我發夢返到伯利恆耶穌出世果陣囉……

輝：下？大佬堅你咁應節呀，聖誕節見到耶穌出世牙？

堅：冇呀……我見唔到呀……我俾隻扮天使既魔鬼呃左添。

王：堅叔，魔鬼成日用啲似是非既事黎迷惑人，所以要小心一啲。

輝：咦？大佬堅，點解你無端端會發依個夢既？你係咪開始相信有神存在呀？

堅：……我……我……

思：（跳）王老師王老師，你都有同堅叔叔傳福音牙？

王：（摸思思頭）緊係啦，傳福音係基督徒既本份同使命黎家嘛。

思：哦。

堅：咦？思思，點解你叫王姑娘做老師既？乜你識王姑娘既咩？

思：係呀，王老師以前係我補習老師黎架，佢仲同我講左好多對耶穌要有信心既道理，仲鼓勵我要練習行路，咁我先至可以行得番咋。

輝：咪係囉，估唔到王小姐又係露宿者之家協會既負責人，有份去探你。唔係得王小姐幫亞思思，思思都唔會行得番，我地成家人都唔會信耶穌。

王：唔好咁客氣啦，我都係本住基督愛人既精神黎鼓勵同埋安慰人。

堅：王姑娘，其實……講真丫，究竟我地要點樣先至可以搵到神呀？而神又點樣愛我地呀？我……我而家想聽聽……

王：好丫，咁我而家簡單講一下啦，（邊說邊走到台前近右）神係個靈，摸唔到、睇唔到。但係我地可以透過唔同事物黎搵到神。係呢思思，你記唔記得我教你嗰啲野呀？

思：我記得！我記得！（走到台前近左）我地望見世界萬物，啲花花草草咁靚，就可以見到神創造既大能。

輝：我都知！（邊說邊走到台前思思旁）我地見到世間一切既美善，就體會到神係美善既源頭。相反，我地見到一切罪惡，就知道神對不義既厭惡，同埋對人類仍然生活喺罪惡當中既悲傷。

王：所以神先至會道成肉身，為我地受苦受死，擔當左我地既罪，將我地從罪惡當中拯救出黎，為我地帶黎光明同埋希望。神對人既愛，就係喺耶穌降生依件事上面顯明出黎。而我地慶祝聖誕節，就係為左紀念依件事。

堅：多謝大家……（下床，走到台前）老實講，夢入面，我好似聽到神佢話……乜野冇睇見就信既人係有福，我都唔係好明。但係，我真係喺你地身上，見得到神既愛喺當中。我識既野好少，你地要多啲再同我講下耶穌啊！我……我都想信耶穌啦。

眾：好呀！

王：係啦，你頭先昏迷嗰陣通知左你屋企人，佢地應該好快到，你唔好再對佢地咁惡咯。

堅：下……但係……但係我冇準備啊。 

（堅叔妻兒進場）

堅妻：老公！

堅仔女：老豆！

堅：下？你地……你地真係黎左牙？諗起黎，我以前真係好錯，好唔啱，真係對你地唔住，你地……會唔會再怪我呀？

堅妻：（深情）老公……

堅仔：老豆，你語好咁啦，我地都有唔啱。

堅女：老豆，你出院之後番番黎屋企啦。

輝：呵呵……一家人開開心心咪好囉！大家都唔好再嗌交咯。

（眾笑）

 （播放鐘聲錄音；亮五彩燈；錄音停）

王：啊！已經十二點了，而家已經係聖誕節啊！

輝：不如我地唱番一首聖誕歌應下節啦。

思：好啊好啊！唱咩歌呀？

堅：就思思今日唱俾我聽嗰隻歌啦。不過我唔識歌詞啊。

輝：簡單啦！我有歌紙！但係……淨係得我地唱唔夠熱閙，不如台下觀眾都一齊唱啦！

眾：好呀！

（眾演員帶領會眾齊唱）

雲裏快樂報佳音，天軍歌聲歡欣。同讚美達至高天，天家福蔭賜萬民。歌聲歡騰快樂頌揚，空中星辰照萬萬人。天軍天使奏樂韻，傳頌救主為我降生。天軍天使奏樂韻，榮耀救主讚美不禁。

神降世萬國歡欣，高聲歡呼主誕生。權柄要盡破開黑暗，謙卑生於伯利恆。拋開尊榮世上做人，將天恩臨救贖罪人。天軍天使奏樂韻，傳頌救主為我降生。天軍天使奏樂韻，榮耀救主讚美不禁。

（全劇完）